ರಾಧಾ_ಮಾಧವ

ಒಂಟಿಯಾಗಿ ರಾಧೆ
ತನ್ನಷ್ಟಕೇ ಕುಣಿದಾಡುತಿದ್ದಳು
ಕೃಷ್ಣನ ಸೇರಲು ಸಮಯ
ಪ್ರಶಸ್ತವೆಂದು ಗೋಪಿಯರು
ಅವನ ಹುಡುಕತೊಡಗಿದರು|

ಇಲ್ಲಿಲ್ಲ ಅಲ್ಲಿಲ್ಲ ಅವನೆಲ್ಲಿ?
ಊರೆಲ್ಲ ಹುಡುಕಾಡಿ ಸೋತು
ಯಮುನೆಯ ತೀರದಿ
ಬಂದು ಕುಸಿದು ಕುಳಿತರು ಎಲ್ಲ|

ಮತ್ತೆ ಊರೊಳಗಿಂದಲೇ
ಕೊಳಲು ನುಡಿಸುತ ಬಂದ
ನಂದಗೋಪಿಯ ಕಂದ
ಅಚ್ಚರಿಯ ಜೊತೆಗವರಿಗಾನಂದ|

ಇಂಚಿಂಚು ಊರಲೆದಿದ್ದು ನಿಜ
ಇಷ್ಟು ಕಣ್‍ತಪ್ಪಿಸಿ ಎಲ್ಲಿದ್ದೆ ರಾಜ?

ರಾಧೆಯ ಖುಷಿಯ ಕಂಡವರು ನೀವು
ನಾ ಜೊತೆಗಿರದೆ ಅದು ಸಾಧ್ಯವೇ
ಹುಚ್ಚಮ್ಮಗಳಿರಾ ನಾನಿದ್ದುದಲ್ಲೇ
ಅವಳು ನನ್ನಲಿ ನಾ ಅವಳಲ್ಲೇ||