ಗುಬ್ಬಿ

ಕಾಗೆಯೂ ಗಿಣಿಯೂ

ಹದ್ದೂ ಬಂದಿವೆ ನೋಡ

ಬಂದವು ಮೈನಾ

ಬುಲ್‍ಬುಲ್ ಕೂಡ|

ಎಲ್ಲಿರುವೆ ನೀನು

ಬೇಗ ಬಾರೇ ಗುಬ್ಬಿ

ಕಾಯುತಿರುವೆ ನಾನು

ಆಡಲು ನಿನ್ನ ತಬ್ಬಿ|

ಬೂದು ಮೈಯಲಿ

ಕಣ್ಣು ಕಪ್ಪು ಚುಕ್ಕೆ

ದೇಹ ಪುಟ್ಟವಾದರೂ

ಗಟ್ಟಿ ನಿನ್ನ ರೆಕ್ಕೆ|

ಸಣ್ಣನೆ ದನಿಯು

ತಣ್ಣಗಿದೆ ಮೈ

ನಿಂತಲ್ಲಿ ನಿಲ್ಲದೆ

ಕುಣಿವೆ ಥೈಥೈ|

ಕಾಗೆ ಹದ್ದುಗಳ

ಓಡಿಸುವೆ ದೂರ

ಹೆದರದೆ ಈಗಲೇ

ನನ್ನೆಡೆ ಬಾರ||

- ತಲಕಾಡು ಶ್ರೀನಿಧಿ

ಬಿಕರಿ

 

(ಶ್ರೀ ಹರಿವಂಶರಾಯ್ ಬಚ್ಚನ್ ಅವರ ಒಂದು ಸುಂದರ ಕವನದ ಅನುವಾದದ ಪ್ರಯತ್ನ. )

ಇಲ್ಲಿ ಎಲ್ಲ ಬಿಕರಿಯಾಗುತ್ತದೆ
ಗೆಳೆಯಾ ಜಾಗರೂಕನಾಗಿರು
ಗಾಳಿಯನ್ನೂ ಬಲೂನಿನಲ್ಲಿ
ತುಂಬಿ ಮಾರಿಬಿಡುವರು|
ನಿಜ ಮಾರಾಟವಾಗುತ್ತದೆ, ಸುಳ್ಳು ಕೂಡ
ಕಥೆ ಕಟ್ಟಿ ಎಲ್ಲವನ್ನೂ ಮಾರಬಹುದಿಲ್ಲಿ
ಮೂರು ಲೋಕಗಳಲ್ಲು ಸಮೃದ್ಧವಾಗಿ
ಹರಡಿರುವ ನೀರೂ ದೊರೆವುದು ಬಾಟಲಿಯಲ್ಲಿ|
ಹೂವಿನಂತೆಂದೂ ಬದುಕದಿರಿಲ್ಲಿ
ಅರಳುತ್ತಿದ್ದಂತೆ ಬೇಗ ಉದುರಿಬಿಡುವೆ
ಸಾಧ್ಯವಾದರೆ ಶಿಲೆಯಾಗಿ ಬಾಳು
ಉಳಿಯ ಹೊಡೆತಕ್ಕೆ ದೇವನೇ ಆಗಿಬಿಡುವೆ||