Monday 29 April 2019

ಆಶಯ



ಬೆರೆಯಬೇಕೆನಿಸುತ್ತದೆ ಕೆಲವೊಮ್ಮೆ
ಬೇರೆ ಇರಬೇಕೆನಿಸುತ್ತದೆ ಇನ್ನು ಕೆಲವೊಮ್ಮೆ
ಬಿರಿದ ಹೂವಾಗುತ್ತದೆ ಮನ ಕೆಲವೊಮ್ಮೆ
ಬರಿದೆ ಮೊಗ್ಗಾಗಿಯೇ ಇರುತ್ತದೆ ಮತ್ತೆ ಕೆಲವೊಮ್ಮೆ
ಬುರುಬುರನೆ ಉಕ್ಕುವ ಉತ್ಸಾಹ ಕೆಲವೊಮ್ಮೆ
ಬರದೆ ಮೊಂಡು ಹಿಡಿದು ನಿಂತ ದನದಂತೆ ಕೆಲವೊಮ್ಮೆ
ಬೇರೆ ಬೇರೆಯದೇ ಆಯಾಮಗಳು ಬದುಕಿನುದ್ದಕೂ
ಬೇರಿಗೆ ಬೆಸೆದುಕೊಂಡ ನೂರು ಕೊಂಡಿಗಳು
ಬರಸೆಳೆದೋ ಬರೆ ಎಳೆದೋ ನಾ
ಬರಿದಾಗುವವರೆಗೆ ಬರೆಸುತ್ತಲೇ ಇರಬೇಕು!

Saturday 20 April 2019

ಏಕಾಕಿತನ

ಇಷ್ಟಮಿತ್ರರು
ಸನಿಹವಿದ್ದರೂ ಕೆಲವೊಮ್ಮೆ
ಏತಕಾಗಿ ಈ ಮನ
ಹಂಬಲಿಸುತ್ತದೆ
ಸಂಭ್ರಮಿಸಲು ಕ್ಷಣಕಾಲ
ಏಕಾಕಿತನ?

Sunday 14 April 2019

ಕೊ ಳ ಲು

ನಾ ಮೇಲು 
ಅಲ್ಲ ನಾ ಮೇಲು
ನನ್ನದೇ ಹೆಚ್ಚುಗಾರಿಕೆ
ನಿನ್ನದೇನು ಮಹಾ


ಹರಿಯ ಶಿರವೇರಿರುವೆ
ಹೆಮ್ಮೆಯಿಂದ ಬೀಗಿತು
ಅಂದದ ನವಿಲುಗರಿ

ಮಾಧವನ ಎದೆಯಲಿರುವೆ
ಗರ್ವದಿಂದ ತೂಗಿತು
ಹಸಿರು ತುಳಸೀಮಾಲೆ

ಮುಗಿಯದ ಪೈಪೋಟಿ
ಯಾರ ಗೆಲುವು 
ಯಾರಿಗೆ ಸೋಲು?

ಹೆಮ್ಮೆ ಗರ್ವಗಳು
ಕೊಚ್ಚಿ ಹೋದವು ಆಲಿಸಿ
ಮುರಳೀಲೋಲನ ಅಳಲು

ಸಾಕಾಗಿತ್ತು ಕೃಷ್ಣನಿಗೆ
ಜಂಭದ ಒಣ ಮಾತುಗಳು
ಬೇಕಿತ್ತು ಏಕಾಂತ ಜೊತೆಗೆ
ಮುದ ನೀಡುವ 
ಆ ತ ನ್ನ ಕೊ ಳ ಲು!

Friday 5 April 2019

IPL2019RCB

#IPL

ಪ್ರತಿ ಮ್ಯಾಚಿಗೆ ಮೊದಲು ವಿರಾಟ್ ಎದುರಾಳಿ ತಂಡದ ನಾಯಕನಿಗೆ ಫೋನಾಯಿಸಿದಾಗ:

ವಿ: ಮಹಿ ನಾನು ವಿರಾಟ್. ನಾಳೆ ಪಂದ್ಯ ನಾವು ಗೆಲ್ಲಬೇಕಲ್ಲ.
ಧೋ: ತಾಕತ್ತಿದ್ದರೆ ಗೆಲ್ಲು ನೋಡೋಣ.
ವಿ: ರೋಹಿತ್. ನಾನು ವಿರಾಟ್. ನಾಳೆ ನೀವು ಸೋಲಬೇಕು.
ರೋ: ಭಾರತದ ನಾಯಕತ್ವಕ್ಕೇ ನಾನು ಉತ್ಸುಕನಾಗಿದ್ದೇನೆ. ಇಲ್ಲಿ ಸೋಲೋದಾ? ನೋ ವೇ.
ವಿ: ಭುವಿ. ನಾನು ವಿರಾಟ್. ವಿಶ್ವ ಕಪ್ ಆಡ್ಬೇಕು ಅಂತಿದೀಯ ತಾನೇ?
ಭು: ನಮ್ ಭಾರತದ ಆಟಗಾರರನ್ನು ಒಪ್ಪಿಸಬಹುದು. ಆದರೆ ಆ ವಿದೇಶಿ ಆರಂಭ ಆಟಗಾರರು ಏನ್ ಮಾಡ್ತಾರೋ ನೋಡ್ಬೇಕು.
ವಿ: ಜಿಂಕ್ಸ್. ನಾನು ವಿರಾಟ್. ಮತ್ತೆ ಭಾರತ ತಂಡಕ್ಕೆ ಬರುವ ಆಸೆ ಇದೆ ತಾನೇ? ನಾಳೆ ಸೋಲ್ಬೇಕು ನಿನ್ ತಂಡ.
ರ: ಅಯ್ಯೋ ಸುಮ್ನಿರಪ್ಪ. ಈ ತಂಡಕ್ಕೇ ನಾಯಕ ಅನ್ನೋದಿಕ್ಕೆ ಇದೀನಿ. ನಮ್ಮದೂ ಗೆಲುವು ಆಗಿಲ್ಲ. ತೊಡೆ ತಟ್ಟೋದೇಯಾ.
ವಿ: ದಿನೇಶ್ ನಾನು ವಿರಾಟ್. ಎಮ್ಮೆಸ್ ಇದ್ರೂ ನಿನಗೆ ಅವಕಾಶ ಸಿಕ್ಕಿದ್ದಕ್ಕೆ ಯರು ಕಾರಣ ಗೊತ್ತಾ? ನಾಳೆ ಮ್ಯಾಚ್?
ದಿ: ಎಲ್ಲರನ್ನೂ ಸುಮ್ಮನಾಗಿಸಬಹುದು ಚೀಕೂ ಭಾಯ್ ..... ಆದರೆ ಆ ರಸೆಲ್ ಏನಾದ್ರೂ ಮಾಡಿದ್ರೆ ನಂಗೊತ್ತಿಲ್ಲ.
ವಿ: ಶ್ರೇಯಸ್ ನಾನು ವಿರಾಟ್.
ಶ್ರೇ: ಹೇಳಿ ಕ್ಯಾಪ್ಟನ್.
ವಿ: ನಾಳೆ ನಮ್ಮ RCB ಗೆಲ್ಬೇಕು. ಅರ್ಥ ಆಯ್ತಾ?
ಶ್ರೇ: ನಮಗೆ ಅಭ್ಯಾಸ ಇದೆ ಬಿಡಿ. ಸಹಜವಾಗಿ ಆಡಿ ಸೋಲ್ತೀವಿ. ನಮ್ಮ ಒಂದಿಬ್ಬರು ಯುವ ಆಟಗಾರರಾದರೂ ಆಯ್ಕೆ ಅಗ್ತಾರೆ ತಾನೇ?
ವಿ: ರವಿ ನನು ವಿರಾಟ್.
ರ: ಆಹಾ ಈಗ ನೆನಪಾಯ್ತಾ? ನಾ ಟೆಸ್ಟ್ ಮ್ಯಾಚ್ ಮಾತ್ರ ಆಡೋಹಾಗೆ ಮಾಡಿರೋ ನಿನ್ನನ್ನು ಸುಮ್ನೆ ಬಿಡೋಲ್ಲ. ಅಲ್ಲದೆ ಈ ರನ್ ಔಟ್ ಬೇರೆ ನನ್ ಪ್ರಾಣ ತಿಂತಿದೆ. wait and see.
ವಿರಾಟ್ (ಸ್ವಗತ) ನನ್ ಮಕ್ಕಳು ನಮ್ ಟೀಮ್ ಬಿಟ್ಟು ಹೋದವ್ರೆಲ್ಲ ಚೆನ್ನಾಗೇ ಆಡ್ತಿದ್ದಾರಲ್ಲ. ಇದೇನ್ ಅನಿಲ್(ಕುಂಬ್ಳೆ) ಶಾಪಾನಾ ಗುರೂ?
                                           _____ ತಲಕಾಡು ಶ್ರೀನಿಧಿ.